യേശുക്രിസ്തുവിന്റെ അപ്പസ്‌തോലന്‍മാരിലൊരാളായ വിശുദ്ധ മത്തായി ഈ സുവിശേഷം രചിച്ചു എന്നാണ് ആദ്യനൂറ്റാണ്ടുമുതലുള്ള വിശ്വാസം. യഹൂദമതത്തില്‍നിന്നു യേശുവിന്റെ ശിഷ്യത്വം സ്വീകരിച്ച പലസ്തീനായിലെ ക്രൈസ്തവസമൂഹത്തെ പ്രധാനമായി ഉദ്‌ദേശിച്ചാണു മത്തായി ഈ സുവിശേഷം രചിച്ചത്. അക്കാരണത്താല്‍, നൂറ്റാണ്ടുകളിലൂടെ യഹൂദജനം പ്രതീക്ഷിച്ചുകൊണ്ടിരുന്ന രക്ഷകനായി യേശുവിനെ ഈ സുവിശേഷത്തില്‍ അവതരിപ്പിക്കുന്നു.അബ്രാഹത്തിന്റെ പുത്രനായ ദാവീദിന്റെ പുത്രന്‍ യേശുക്രിസ്തുവിന്റെ വംശാവലി എന്ന ശീര്‍ഷകത്തോടെയാണു ഗ്രന്ഥം ആരംഭിക്കുന്നതുതന്നെ. ക്രിസ്തുമതം യഹൂദമതത്തിന്റെ തുടര്‍ച്ചയും പരിപൂര്‍ത്തിയുമാണെന്നു സ്ഥാപിക്കാനും സുവിശേഷകന്‍ ശ്രമിക്കുന്നു. അദ്‌ദേഹത്തിന്റെ വീക്ഷണത്തില്‍, യഹൂദജനത പ്രതീക്ഷിച്ചിരുന്ന സ്വര്‍ഗ്ഗരാജ്യമാണ് യേശുവിന്റെ പ്രബോധനങ്ങളിലെ മുഖ്യപ്രമേയം. ഈ സ്വര്‍ഗ്ഗരാജ്യമാകട്ടെ യഹൂദരുടെ ഇടുങ്ങിയ ദേശീയചിന്താഗതിക്ക് അതീതമായി മനുഷ്യവര്‍ഗ്ഗത്തെ മുഴുവനും ആശ്‌ളേഷിക്കുന്ന രക്ഷാകരപദ്ധതി ഉള്‍ക്കൊള്ളുന്നതുമാണ് മത്തായിയുടെ സുവിശേഷം എന്നപേരില്‍ ഇന്നു നമുക്കു ലഭിച്ചിരിക്കുന്ന സുവിശേഷത്തിന്റെ മൂലരൂപം ഒന്നാംനൂറ്റാണ്ടിന്റെ അവസാനഘട്ടത്തില്‍ വ എ.ഡി.75വനും 90വനും ഇടയ്ക്ക് വ രചിക്കപ്പെട്ടതാണെന്നു കരുതുന്നു. എന്നാല്‍, ഇതിനു മുമ്പുതന്നെ അരമായ ഭാഷയില്‍ ക്രിസ്തുവിന്റെ വചനങ്ങളുടെ ഒരു ശേഖരമോ സുവിശേഷംതന്നെയോ മത്തായിയുടേതായി ഉണ്ടായിരുന്നുവെന്നും പാരമ്പര്യമുണ്ട്.ഇതു വാസ്തവമായിരിക്കുവാന്‍ സാദ്ധ്യതയുണ്ടെങ്കിലും, പ്രസ്തുത സുവിശേഷത്തിന്റെ കൈയെഴുത്തു പ്രതിയൊന്നും കണ്ടുകിട്ടിയിട്ടില്ല.മത്തായിയുടെ സുവിശേഷത്തെ താഴെക്കാണും വിധം വിഭജിക്കാം :1. യേശുവിന്റെ ജനനവും പരസ്യജീവിതത്തിനു തയ്യാറെടുപ്പും (1, 1വ4, 16 ): കന്യകയില്‍ നിന്നുള്ള ജനനം, ജ്ഞാനികളുടെ ആരാധന, സ്‌നാപകയോഹന്നാന്റെ ദൗത്യം, യേശുവിന്റെ ജ്ഞാനസ്‌നാനം,മരുഭൂമിയിലെ പരീക്ഷ എന്നിവയാണ് ഈ ഭാഗത്തു പ്രതിപാദിക്കുന്നത്.2. യേശുവിന്റെ പ്രബോധനങ്ങളും അദ്ഭുതങ്ങളും (4, 17വ16,20): പലപ്പോഴായി യേശു നല്കിയ പ്രബോധനങ്ങളുടെയും ദിവ്യവചസ്സുകളുടെയും സമാഹാരമായ ഗിരിപ്രഭാഷണം, സ്വര്‍ഗ്ഗരാജ്യത്തെക്കുറിച്ചുള്ള ഉപമകള്‍, വിവിധതരത്തിലുള്ള അദ്ഭുതങ്ങള്‍ തുടങ്ങിയവ ഇതില്‍ വിവരിക്കപ്പെടുന്നു.3. യേശുവിന്റെ പീഡാനുഭവവും മരണവും (26,21-28,20):പീഡാനുഭവത്തെക്കുറിച്ചുള്ള പ്രവചനങ്ങള്‍, ജറുസലെത്തേക്കുള്ളയാത്ര, ജറുസലെമില്‍വച്ചു ജനപ്രമാണികളുമായുണ്ടായ ഏറ്റുമുട്ടല്‍, ശിഷ്യന്‍മാര്‍ക്കു നല്കുന്ന അവസാന പ്രബോധനങ്ങള്‍, പീഡാനുഭവം, മരണം, ഉയിര്‍ത്തെഴുന്നേല്പ് എന്നിവയാണ് അവസാനഭാഗത്തു വിവരിക്കുന്നത്.